فى المرة اللى فاتت وقفنا عند التحضير للسفر لمدينة مبارك ببرج العرب

تخيلوا معايا واحد هيسافر من طيخ طاخ طوخ الى برج العرب فى الساحل الشمالى على امل انه يلاقى الدكتور اللى صاحبة قاله عليه هناك _اخر مرة صاحبى قالى انه قابله قبل مايسافر امريكا ب 3 ايام وانه احتمال يكون فى امريكا واحتمال لا_

بس زى ما قالى صاحبى بالضبط It worth trial

سافرت من طيخ طاخ طوخ الى رمسيس الى الاسكندرية الصحراوى وانا عاقد العزم انى مش راجع من هناك غير ومعايا حل للدايرة المفرغة اللى عمال الف فيها من سنة ومش راضيه تخلص كنت عاقد العزم انى مش هرجع ابد من هناك- حتى لو نمت ادام باب المدينة- غير ومعايا حل


 

فى الطريق من الطريق الصحراوى لبرج العرب اتعرفت مندوب شركة لابتكنولوجى كان رايح مناقصة فى المدينة ودار بينا حوار


 

انت تعرف الدكاتره اللى جوه واتعملت معاهم

اه تقريبا اتعملت معاهم كلهم

طيب من كويس فيهم وشخص بيحب يساعد الناس

هو احسن واحد فيهم د ا.ح _اللى انا رايحله_ بس هو دلوقتى فى امريكا _اشطة ياحلو اول القصيدة بس برده مش هيأس هخش يمكن يكون رجع من امريكا_

طيب والدكاتره التانين

كويسن بس مش زي دكتور ا.ح بس فى الدكتور وليم ده المساعد بتاعه كويس برضه بس غالبا هتلاقيه النهارده فى اغاخان مش فى المعمل_ده شكلها باينه من اولها فعلا_


 

يااااااااااااااااااااااحلاوة الله المستعان


 

دخلت المدينة وسالت على دكتور ا.ح الامن دلنى على مكتبه بس هو لسه مجاش من امريكا طيب مين موجود مكانه الدكتوره (ا)

رحتلها واتكلمت معاها بصراحة تعاطفت معايا جدا وحاولت تساعدنى فى دلتنى على دكتور تانى ممكن يساعدنى بس الدكتور ب ده كان فى المناقصة اللى كان جايلها اخونا بتاع اللابتكنولوجى

طيب استريح فى المعمل مع الباحث ع وهو تلميذ الدكتور ب لغاية لما المناقصة تخلص

اتعرفت على دكتور ع وتبادلنا الحديث فاخبرنى ان فى دكتور فى قسم البروتين شغال فعلا على مصل لفيرس سى ممكن تطلعله الدور التانى وتكلمه_يامسهل الحال يارب هتزهزه اهيه_


 

طلعت للدكتور التانى وكلمته وحكتله عن حكايتى اللى هى اكثر مأساوية من قصة اولفرتوست ذات نفسه_مع احترامى وتقدير لخيال تشالز ديكنز بس فعلا الواقع امر من الخيال _

قالى فى النهاية انه هينتظر تليفون من المشرف بتاعى فى عين شمس علشان يشوف وينسق معاه اذا كان ممكن يتعاونوا مع بعض ولا لاء

انا كنت طاير من الفرحة صراحة اخيرا باب اتفتح

رجعت تانى القاهرة وكلمت الدكتور المشرف بتاعى وحكتله و اديته الكرت علشان يكلم الدكتور ر(والحمد لله انه مكلموش هنعرف كمان شوية ليه)


 

حلو كده يابوعبيدة شكلها اتحلت اخيرا ياريس وربنا هيوفأك ان شاء الله وتحقق اللى انت عايزه


 

بس فى مشكلة هنا !!!!

الدكتور اللى انا كنت جايله الاول كان عارض على زميلى انه يشتغل معاه فى مشروع معين وانه هيديله فلوس كاعانه ولما المشروع يخلص هيدله حصة من العائد

انما الدكتور ده عايز يدفعنى فلوس كتيره بدون اى داعى . انا عندى استعداد ادفع فعلا فلوس مايقرب 10 الف جنيه لحد ما الرسالة تخلص بس الفكرة ان الموضع اسهل من كده على حد وصف صاحبى لى من خلال حديثه مع الدكتور ا.ح


 

كلمت الدكتور ر بعد فترة وقلتله عايز اجى لحضرتك علشان انضم للمشروع قالى ماشى بس تجيب ورقة مختومة من الكلية انك عايز تشتغل عندنا العملى ونشوف هتدفع كام فى السنة وتدفعهم وربنا يسهل


 

انا قلت ورقه وكلية هى الكلية اساسا راضية تقبلنى غير لما اجبلهم ورقة تثبت انى فى مكان هعمل فيه العملى


 

هو الدكتور ده مكلكع العملية كده ليه؟؟؟


 

لا ياعم الله الغنى انا هكلم الدكتور ا.ح تانى يمكن يكون رجع من امريكا


 

كلمت الدكتور ع _كنت اخدت رقم موبايله من الزيارة الاولى_ وسالته هو الدكتور ا.ح جه من امريكا ولا لسه قالى جه ولو عايز تيجيله ياريت بسرعة علشان هو احتمال يسافر تانى

بعت ايميل للدكتور ا.ح وقلتله انا نفسى اشتغل مع حضرتك

رد على وقالى انت اكثر من مرحب بك بس انت عارف هتاخد كام لما تشتغل معايا ؟ وانت صيدلى ففكر فى الموضوع وعلى العموم لو عايز تعمل الماجيستير معايا المعمل تحت امرك

مكنتش متخيل الرد ده بصراحة ياااااااااااااه الواضح ان العملية بدأت تمشى زى السكسنة فى الحلاوة

كلمته فى التليفون وعرفته بنفسى تانى و اتكلمنى مع بعض وحددنا معاد للزيارة

بصراحة دكتور فى قمة الذوق وديسنت جدا


 

رحتله فى الموعد رحب بى جدا

حكتله على اللى حصل بينى وبين الدكتور ر فقالى انه مش مستعد ابدا يشترك مع الدكتور ر فى اى مشروع لانه قبل كده حاول يتعاون معاه فى شغل ولم يتفقوا وان الدكتور ده مطفش الطلبة ومطلع عين الطلبة اللى معاه والطلبة اللى معاه بقالهم 3 سنين ومتقدموش خطوة واحده فى الماجيستير

وقالى سبحان الله فى ناس ربنا اختصهم بقضاء حوائج ناس وناس تانيه كل همهم انهم يعملوا بلوكدج للناس

وطيب والحل ؟؟

الحل انك تشوف المشرف بتاعك اتفق على ايه مع الدكتور ر ونشوف

كلمت المشرف وسألته اذا كان كلم الدكتور ر ولا لسه ؟؟؟ قالى لا والله لسه مكلمتوش انشغلت شوية

قلتله الحمد لله يادكتور ان حضرتك مكلمتوش فى دكتور تانى عايز يكلم حضرتك اه ممكن تكلمه


 

اتكلموا مع بعض وبعد ما المكلمة خلصت الدكتور ا.ح عمل مكالمة تليفونية وبعدها جيه قالى


 

خلاص هتشتغل معايا فى برنامج معين بالتعاون مع مركز بحثى فى المنصورة(ياكرم الله)

وحددنا معاد نتقابل فيه فى المنصورة .

ايه اللى حصل فى المنصورة وايه اللى حصل بعد المنصورة؟؟

هنعرف فى الجزء الرابع

اول فصول الحلم المنشود.