من يجى عام كده ولا اكثر كنت عزمت خلاص انى اعمل مدونة.

بس سألت نفسى سؤال

ايه اللى هتستفاده من عمل المدونة؟؟؟ والاهم ايه اللى ممكن تضيفه لعالم المدونات

رغم ان الوقت ده لم يشهد ثورة المدونات الحقيقية وكان عدد المدونات اقل من ربع المدونات الان

بس كنت كل ماادخل مدونة واقرأ اللى موجود بيها واخرج فى النهاية صفر اليدين لان الحاج صاحب المدونة عام مدونة دايرى له ومكلفش نفسه ينبهنا لكده فى النهاية

حسيت فعلا انى لو عملت مدونة مش هفيد الناس كتير

بالعكس انا ممكن اضيع وقتهم

فاستقر الامر على اغلاق الموضوع وعدم التدوين لحين اشعار اخر

وفعلا جه عم اشعار اخر

وكان الحاح بعض المقربين لى بالتدوين

يابنى دون ...اعملك مدونة كده... انت مش عامل مدونة... طيب ليه بس كده ... كانى مرتكب جريمة يعنى

على العموم ادينى بدأت تدوين اه

بس ليا طلب عند كل اللى هيخش المدونة دى

لو حسيت انك بتضيع وقتك هنا ياريت ماتكتفيش انك ترمى مدونتى فى التراش كان وبس

لا كمان انصحنى اقفها وبالشمع الاحمر